మనస్సాక్షి, అనంతపురం : పారిశుద్ధ్య కార్మికులకు నెలకు ఒకసారి హెల్త్‌ క్యాంప్‌ నిర్వహించాలని జిల్లా కలెక్టర్‌ డాక్టర్‌ వినోద్‌కుమార్‌ ఆదేశించారు. కార్మికుల కుటుంబ సభ్యులకు కూడా హెల్త్‌ చెకప్‌ చేయాలని, ఆ క్యాంపులకు ఎంతమంది వచ్చారు అనేది రిపోర్టు ఇవ్వాలన్నారు. మాన్యువల్‌ స్కావెంజర్స్‌ చట్టం అమలు పకడ్బందీగా చేయాలని తెలిపారు. గురువారం  కలెక్టరేట్లోని మినీ కాన్ఫరెన్స్‌ హాల్లో సాంఘిక సంక్షేమ శాఖ ఆధ్వర్యంలో మాన్యువల్‌ స్కావెంజర్స్‌ వ్యవస్థ నిర్మూలనపై మున్సిపల్‌ కమిషనర్లు, జిల్లా పంచాయతీ అధికారి, సంబంధిత అధికారులతో జిల్లా విజిలెన్స్‌ కమిటీ (మాన్యువల్‌ స్కావెంజర్స్‌ చట్టం - 2013) సమావేశం నిర్వహించారు.  ఈ సందర్భంగా మ్యాన్‌ హోల్‌లో మనుషులను దింపుతున్నారని, ఇంతకుముందు అలా చేసిన అధికారులపై విచారణ చేసి షోకాజ్‌ నోటీసులు ఇచ్చి తగిన చర్యలు తీసుకోవాలని తాడిపత్రి మున్సిపల్‌ కమిషనర్‌ని కలెక్టర్‌ వినోద్‌కుమార్‌ ఆదేశించారు. ఈనెల 8వ తేదీన అంతర్జాతీయ మహిళా దినోత్సవం సందర్భంగా మహిళా పారిశుద్ధ కార్మికులకు అన్ని మున్సిపాలిటీలలో మెడికల్‌ క్యాంపులు నిర్వహించాలన్నారు. జిల్లా విజిలెన్స్‌ కమిటీ మెంబర్లతో వాట్సప్‌ గ్రూప్‌ తయారు చేయాలని, అందులో అన్ని రకాల సమాచారం అందించాలన్నారు. జిల్లా విజిలెన్స్‌ కమిటీ సమావేశం నిర్వహణ గురించి ప్రజా ప్రతినిధులతో మాట్లాడి సమాచారం ఇవ్వాలన్నారు.

పారిశుద్ధ కార్మికులకు బట్టలు, సబ్బులు, రేడియో జాకెట్‌, బ్లౌజులు, యూనిఫామ్‌, తదితర అన్ని రకాల పరికరాలు అందించడంతోపాటు వాటిని రోజు ఉపయోగించేలా చూడాలన్నారు. మున్సిపాలిటీల్లో ఎంతమంది కార్మికులు ఉన్నారు? ఎన్ని పరికరాలు అవసరమవుతాయి? ఇప్పటివరకు ఎన్ని అందించారు? అనేదానిపై నివేదిక అందించాలన్నారు. కార్మికులకు సక్రమంగా జీతాలు ఇవ్వాలన్నారు.  స్వయం సహాయక సంఘాలలో సఫాయి కర్మచారులు ఉన్నారని, వారికి ప్రాధాన్యత ఇచ్చి రుణాలు, శిక్షణ అందించేలా చూడాలని మున్సిపల్‌ కమిషనర్‌, ఎల్డిఎంలను ఆదేశించారు. గతంలో మాన్యువల్‌ స్కావెంజర్స్‌ గా పనిచేసిన వారికి ప్రభుత్వం నుంచి ఏ విధమైన సాయం అందించారో నివేదిక అందించాలని సూచించారు. క్షేత్రస్థాయిలో ఎక్కడైనా మాన్యువల్‌ స్కావెంజర్స్‌ పనిచేస్తున్నట్లు ఫిర్యాదులు వస్తే ధ్రువీకరణ చేయాలని ఆదేశించారు. సమావేశంలో సోషల్‌ వెల్ఫేర్‌ జెడి రాధిక, నగర పాలక సంస్థ కమిషనర్‌ బాలరాజు, డ్వామా పిడి సలీమ్‌ బాషా, హౌసింగ్‌ పిడి శైలజ, ఎల్డిఎం నర్సింగరావు, పీఆర్‌ ఎస్‌ఈ జహీర్‌ అస్లాం, బిసి కార్పొరేషన్‌ ఈడి సుబ్రమణ్యం, డిటిడబ్ల్యుఓ రామాంజనేయులు, డీఎంహెచ్‌ఓ డా.ఈబి.దేవి, మెంబర్లు పెన్నోబుళేసు, వినోద్‌ కుమార్‌, రియాజ్‌ భాష, పద్మావతి, మున్సిపల్‌ కమిషనర్‌లు, ఆయా శాఖల అధికారులు, తదితరులు పాల్గొన్నారు.

మనస్సాక్షి, పుట్టపర్తి : అంతర్జాతీయ మహిళా దినోత్సవం పురస్కరించుకుని సీనియర్‌ జర్నలిస్ట్‌ ప్రతిమ ధర్మరాజ్‌ను శ్రీసత్యసాయి జిల్లా ఎస్పీ రత్న సన్మానించారు. పుట్టపర్తిలోని సాయి ఆరామంలో మహళా సాధికారత`సవాళ్లు`పరిష్కారాలు అనే అంశంపై గురువారం వర్క్‌షాప్‌ నిర్వహించారు. ముఖ్య అతిథిగా ఎస్పీ రత్న హాజరై సమాజ శ్రేయస్సు కోసం ఉత్తమ సేవలను అందించిన వారిని శాలువాతో సత్కరించి మొమెంటోలు అందజేశారు. స్మార్ట్‌ హెల్మెట్‌ తయారు చేసిన ప్రభుత్వ ఉపాధ్యాయురాలు విజయభార్గవి, ఉమ్మడి అనంతపురం జిల్లాకు చెందిన మహిళా జర్నలిస్ట్‌ ప్రతిమ ధర్మరాజ్‌, రజని, ప్రియాంక, సిరిని సన్మానించారు. అంతకుముందు మహిళా దినోత్సవ ఆవశ్యకతను ఎస్పీ రత్న వివరించారు. మహిళలు తమ హక్కులను తెలుసుకుని చట్టాలను వినియోగించుకోవాలని సూచించారు. అనంతరం మహిళల రక్షణ కోసం రూపొందించిన చట్టాలను తెలియజేశారు. కార్యక్రమంలో రెడ్స్‌ స్వచ్ఛంద సంస్థ ప్రతినిధి భానుజా, డీఎస్పీలు ఆదినారాయణ, విజయ్‌కుమార్‌ తదితరులు పాల్గొన్నారు.  

మనస్సాక్షి , పామిడి : పామిడి పంచాయతీ ఈవోగా విధులు నిర్వర్తించి గార్లదిన్నె మండలానికి బదిలీ అయిన చంద్రశేఖర్‌ను అనంతపురంలోని ఆయన స్వగృహంలో వైసీపీ నేత, మాజీ మార్కెట్‌యార్డు చైర్మన్‌ కత్రిమల చెన్నకేశవరెడ్డి ఆధ్వర్యంలో ఘనంగా సన్మానించారు. ఈ సందర్భంగా కత్రిమల చెన్నకేశవరెడ్డి మాట్లాడుతూ పామిడి గ్రామపంచాయతీ కార్యదర్శిగా  విధులు నిర్వహించి గ్రామ అభివృద్ధికి ఎంతగానో కృషి చేశారని కొనియాడారు. అధికారులు వస్తుంటారు.. వెళ్తుంటారు.. కానీ రాజకీయాలకు అతీతంగా ప్రజల కోసం పనిచేసే చంద్రశేఖర్‌ లాంటి  అధికారులు చాలా అరుదుగా ఉంటారని పేర్కొన్నారు. ఈ కార్యక్రమంలో కత్రిమల సర్పంచ్‌ చంద్రశేఖర్‌ రెడ్డి, నాగూరు ఈశ్వర్‌ రెడ్డి, సాకే ఓబులేసు,మీసాల రామచంద్ర, కృష్ణారెడ్డి,శివారెడ్డి,జనార్దన్‌ రెడ్డి, గోపాల్‌, రజాక్‌, సాలెహ, హరి, మహేశ్వర్‌ రెడ్డి, నీలకంఠారెడ్డి,నాగేష్‌ యాదవ్‌ తదితరులు పాల్గొన్నారు.

మనస్సాక్షి, చిలమత్తూరు :  మండలంలోని లక్ష్మీపురంలో ఆదివారం మహర్షి వాల్మీకి విగ్రహాన్ని ఆవిష్కరించారు. ముఖ్య అతిథిగా అనంతపురం ఎంపీ అంబికా లక్ష్మినారాయణ హాజరయ్యారు. ఈ సందర్భంగా ఆయన మాట్లాడుతూ వాల్మీకి మహర్షి సమస్త భారతావనికి ఆరాద్యుడని తెలిపారు. ఏ నామం చేత భారత దేశం మేల్కొంటుందో, ఏ నామం హిందూ సమైక్యతను చాటుతున్నాదో ఆ ‘‘రామ నామాన్ని’’ యావత్తు ప్రపంచానికి పరిచయం చేసిన మహనీయుడు వాల్మీకి మహర్షి అని అన్నారు. ఆ మహనీయుడి విగ్రహం ఎక్కడ ఉంటుందో ఎక్కడ ఆయనకు నిత్య పూజలు అందుతాయని, ఆ ప్రాంతం ఆ గ్రామం సిరి సంపదలతో వర్దిల్లుతుందని అన్నారు. వాల్మీకి మహర్షి యావత్తు హిందూ సమాజం పూజించగలిగిన మహనీయుడని అన్నారు. ప్రభుత్వం కూడా వాల్మీకి జయంతిని రాష్ట్ర పండుగగా గుర్తించిందని గుర్తు చేశారు. వాల్మీకుల అభివృద్ధి కోసం కూటమి  ప్రభుత్వం పాటు పడుతుందని చెప్పారు. కార్యక్రమంలో టీడిపి నాయకులు, హిందూపురం ఎమ్మెల్యే బాలక్రిష్ణ వ్యక్తిగత కార్యదర్శి సురెంద్రబాబు, బాలాజి, అంజినప్ప, రంగారెడ్డి, గంగాధర్‌, వాల్మీకులు నాగేంద్ర, నరేంద్ర, ప్రవీణ్‌ కుమార్‌, చరణ్‌, సూరి మరసనపల్లి అంజి, శీన, నాగరాజు, ముద్దన్న, గంగాధర తదితరులు పాల్గొన్నారు.

మనస్సాక్షి, కణేకల్లు: మండలంలోని ఎర్రగుంట శివారులో హెచ్ఎల్సీలో నాలుగు రోజుల క్రితం గల్లంతైన వ్యక్తి ఆదివారం కణేకల్లులోని చిక్కణ్ణేశ్వర చెరువులో తేలాడు. పోలీసులు తెలిపిన వివరాల మేరకు.. ఎర్రగుంటకు చెందిన  కురుబ కిషోర్ కుమార్(43) గురువారం సాయంత్రం 5 గంటల సమయంలో   గ్రామ శివారులోని హెచ్ఎల్సీ 5 వ డిస్ట్రిబ్యూటరీ కాలవ వద్ద ఉన్న హెచ్ఎల్సీ గట్టు పై మోటార్ సైకిల్, మొబైల్ ఫోన్, పర్సు వదిలి అదృశ్యం అయ్యాడు. హెచ్ఎల్సీలో గల్లంతయ్యాడని భావించి కుటుంబసభ్యులు, బంధువులు పోలీసులకు సమాచారం ఇచ్చారు. భార్య అరుణ ఫిర్యాదు మేరకు పోలీసులు మిస్సింగ్ కేసు నమోదు చేసుకున్నారు. నాలుగు రోజులుగా కుటుంబసభ్యులు, బంధువులు, గ్రామస్తులు, పోలీసులు గాలింపు చర్యలు చేపట్టారు. ఆదివారం కణేకల్లులోని చిక్కణ్ణేశ్వర చెరువులో కురుబ కిషోర్ కుమార్ మృతదేహం లభ్యమైందని ఎస్సై నాగమధు తెలిపారు. ఈ మేరకు కేసు నమోదు చేసుకొని దర్యాఫ్తు చేస్తున్నట్లు ఎస్సై తెలిపారు. మృతుడికి భార్య అరుణతో పాటు ఇద్దరు కుమార్తెలు ఉన్నారు.

మనస్సాక్షి, కణేకల్లు: కణేకల్లు - ఉరవకొండ ప్రధాన రోడ్డులో వేదావతి నదిపై రూ.48 కోట్లతో నిర్మించనున్న వంతెన నిర్మాణానికి రాయదుర్గం ఎమ్మెల్యే కాలవ శ్రీనివాసులు శనివారం భూమిపూజ చేసి శిలాఫలకాన్ని ఆవిష్కరించారు. ఈ సందర్భంగా అక్కడ ఏర్పాటుచేసిన సమావేశంలో ఎమ్మెల్యే మాట్లాడారు. కణేకల్లు - మాల్యంకు సరైన రహదారి లేక కొన్నేళ్లుగా ప్రజలు తీవ్ర ఇబ్బందులు ఎదుర్కొంటున్నారని తన దృష్టికి వచ్చిందన్నారు. ప్రజల సమస్యను దృష్టిలో ఉంచుకుని గత ఎన్నికల ముందు ఇచ్చిన హామీ మేరకు వంతెన నిర్మాణం చేస్తున్నట్లు తెలిపారు. ఈ సమస్యను రాష్ట్ర ముఖ్యమంత్రి నారా చంద్రబాబు నాయుడు దృష్టికి తీసుకెళ్లి రాష్ట్ర ఆర్థిక శాఖ మంత్రి పయ్యావుల కేశవ్, ఆర్ అండ్ బీ శాఖ మంత్రి బీ.సీ. జనార్దన్ రెడ్డి సహకారాలతో నూతన బ్రిడ్జి నిర్మాణానికి ఎన్ డీ బీ కింద ప్రభుత్వం రూ.48 కోట్లు నిధులు మంజూరు చేసిందన్నారు. గత ప్రభుత్వం నిర్లక్ష్యం వల్ల బ్రిడ్జి నిర్మాణం కాలేదన్నారు. రాష్ట్రం ఆర్థిక సంక్షోభంలో ఉన్న విషయం అందరికీ తెలిసిందే. ఈ ఒక్క సంవత్సరం ఏ పనులు అడగలేని క్లిష్ట పరిస్థితుల్లో ఉన్నా ప్రజా అవసరాల దృష్ట్యా ఈ సమస్యను ముఖ్యమంత్రి నారా చంద్రబాబునాయుడి దృష్టికి తీసుకెళ్లగా ఆయన సానుకూలంగా స్పందించారన్నారు. ముఖ్యమంత్రి నారా చంద్రబాబునాయుడి ఆశీస్సులతో, ఆర్థిక శాఖ మంత్రి పయ్యావుల కేశవ్, ఆర్ అండ్ బీ శాఖ మంత్రి బీ.సీ.జనార్దన్ రెడ్డి, ఆర్ అండ్ బీ ప్రిన్సిపల్ సెక్రటరీ కాంతిలాల్ దండే సహాయ సహకారాలతో నూతన బ్రిడ్జి నిర్మాణానికి రాష్ట్ర ప్రభుత్వం అనుమతులు మంజూరు చేసిందన్నారు. గత ఎన్నికల హామీ ప్రకారం  కూటమి ప్రభుత్వం అధికారంలోకి వచ్చిన మూడు నెలల్లోపే బ్రిడ్జి నిర్మాణం చేపడుతున్నామని అన్నారు.

దసరా రోజున నా పుట్టిన రోజు కావడంతో అదే రోజు శంకుస్థాపన చేయాలనేదే నా సంకల్పం. ప్రభుత్వంలో ఎన్ని ఇబ్బందులు వచ్చినా అన్నిటినీ అధిగమించి శంకుస్థాపన చేస్తానని చెప్పాను. మాట ఇచ్చిన ప్రకారం దసరా రోజు శంకుస్థాపన చేయడం అదృష్టంగా భావిస్తున్నానని అన్నారు. ఈ బ్రిడ్జి నిర్మాణంతో దీర్ఘకాలంగా ఉన్న ప్రజల కష్టాలు తీరనున్నాయన్నారు. అలాగే కణేకల్లులో డిగ్రీ కళాశాల ఏర్పాటుకు ఎన్నికల సమయంలో నేను ఇచ్చిన హామీని కూడా త్వరలో నెరవేర్చేందుకు కృషి చేస్తున్నానని సభాముఖంగా చెప్పారు.

అనంతరం కూటమి టీడీపీ నాయకులతో కలిసి పుట్టినరోజు వేడుకలు జరుపుకున్నారు. పలురు నాయకులు తెచ్చిన బర్తడే కేక్ లను ఎమ్మెల్యే కాలువ శ్రీనివాసులు కట్ చేశారు. కూటమి నాయకులు, ప్రజా ప్రతినిధులు, అధికారులు, కార్యకర్తలు పుట్టినరోజు శుభాకాంక్షలు తెలిపారు. ఈ కార్యక్రమంలో కాంట్రాక్టర్ లు రామ సుబ్బారెడ్డి, శ్రీనివాసరెడ్డి, జనసేన పార్టీ రాయదుర్గం ఇన్చార్జ్ మంజునాథ్ గౌడ్, మండల కన్వీనర్ లాలెప్ప, రైస్ మిల్ ఆనంద్, ఆది, గోపులాపురం బసవరాజ్, వేలూరు మరియప్ప, కలేకుర్తి సుదర్శన్, ఎన్. హనుమాపురం సర్పంచ్ జయరాంచౌదరి, ఎంపీటీసీ నరేంద్రబాబు, షేక్ ముజ్జు, చంద్ర, చాంద్ భాషా, నవీన్, శరబన గౌడ్, చిన్న ఫక్రుద్దీన్, ఎంపీపీ లీలావతి, జెడ్పిటిసి డి. పద్మావతి, ఆర్ అండ్ బీ అధికారులు, కార్యకర్తలు పెద్ద ఎత్తున పాల్గొన్నారు.

మనస్సాక్షి, అనంతపురం ప్రతినిధి :  అనంతపురం జిల్లాలో ప్రైవేట్‌ మద్యం దుకాణాల లాటరీ ప్రక్రియకు సర్వం సిద్ధమైంది. జిల్లా ఎస్పీ జగదీష్‌ ఆదేశాల మేరకు ఎక్కడా అవాంఛనీయ ఘటనలు జరగకుండా పటిష్ట బందోబస్తు చర్యలు చేపట్టనున్నట్లు అనంతపురం డీఎస్పీ శ్రీనివాసరావు తెలిపారు. అనంతపురం జేఎన్‌టీయూలోని ఎన్టీఆర్‌ ఆడిటోరియంలో సోమవారం ఉదయం 7 గంటలకు ఓపెన్‌ లాటరీ ప్రక్రియ ప్రారంభం కానున్నట్లు చెప్పారు. జిల్లా వ్యాప్తంగా మద్యం దుకాణాల కోసం దరఖాస్తు చేసిన వారంతా రానున్న నేపథ్యంలో జేఎన్‌టీయూ పరిసర ప్రాంతాల్లో గట్టి బందోబస్తు చేపట్టామన్నారు. లాటరీ ప్రక్రియ సజావుగా సాగడం కోసం నలుగురు డీఎస్పీలు, 10 మంది సీఐలు, 30 మంది ఎస్‌ఐలు, పోలీస్‌ సిబ్బంది 275 మందిని ఏర్పాటు చేశామని డీఎస్పీ శ్రీనివాసరావు తెలిపారు. జేఎన్‌టీయూ ఆడిటోరియంకు చేరుకునే ప్రాంతంలో మూడు చెక్‌ పోస్టులు ఏర్పాటు చేశామని, ఎక్కడా అవాంఛనీయ ఘటనలు జరగకుండా చర్యలు తీసుకున్నామని తెలిపారు. 

మనస్సాక్షి, అనంతపురం ప్రతినిధి :  అదృష్ట లక్ష్మి లాటరీ రూపంలో తలుపు తట్టే రోజు రానే వచ్చింది..! ప్రైవేట్‌ మద్యం దుకాణాల ఏర్పాటు కోసం సోమవారం ఓపెన్‌ లాటరీ నిర్వహించనున్నారు. అనంతపురం జిల్లాకు సంబంధించి జేఎన్‌టీయూలోని ఎన్టీఆర్‌ ఆడిటోరియంలో, శ్రీసత్యసాయి జిల్లాకు సంబంధించి పుట్టపర్తిలోని సాయి ఆరామంలో సోమవారం ఉదయం 7 గంటల నుంచి లాటరీ ప్రక్రియ ప్రారంభం కానుంది. ఇందుకు సంబంధించి ఏర్పాట్లకు అధికార యంత్రాంగం పూర్తి చేసింది. మద్యం దుకాణాల కోసం దరఖాస్తు చేసే సమయంలో జనరేట్‌ అయిన ఎంట్రీ పాస్‌తో పాటు ఏదైనా గుర్తింపు కార్డు ఉంటేనే ఓపెన్‌ లాటరీ ప్రాంగణంలోకి దరఖాస్తుదారులను అనుమతించనున్నారు. అనంతపురం జిల్లాలో 136 మద్యం దుకాణాల ఏర్పాటుకు 3265 దరఖాస్తులు అందాయి. శ్రీ సత్యసాయి జిల్లాలో 87 షాప్‌ల కోసం 1518 మంది దరఖాస్తు చేశారు. ఉమ్మడి జిల్లాలో అత్యధికంగా అనంతపురం అర్బన్‌ నియోజకవర్గంలో 30 దుకాణాల కోసం 1159 మంది దరఖాస్తు చేశారు. అత్యల్పంగా తాడిపత్రి నియోజకవర్గంలో 20 దుకాణాలకు 106,  రాప్తాడు నియోజకవర్గంలో 13 దుకాణాల ఏర్పాటుకు 106 మంది దరఖాస్తు చేశారు. ఉవరకొండ నియోజకవర్గంలో 13 దుకాణాలకు 413 దరఖాస్తులు, శింగనమలలో 18 షాపులకు 605,గుంతకల్లు నియోజకవర్గంలో 23 దుకాణాలకు 374, రాయదుర్గం నియోజకవర్గంలో 14 షాపులకు 377,కళ్యాణదుర్గం నియోజకవర్గంలో 10 దుకాణాలకు 154, ధర్మవరం నియోకజవర్గంలో 20 షాపులకు 219, పెనుకొండ నియోజకవర్గంలో 15 దుకాణాల ఏర్పాటుకు 338, పుట్టపర్తి నియోజకవర్గంలో 13 షాపుల కోసం 424, హిందూపురం నియోజకవర్గంలో  9 దుకాణాలకు 185, కదిరి నియోజకవర్గంలో 15 దుకాణాలకు 161, మడకశిర నియోజకవర్గంలో 10 మద్యం షాపుల కోసం    162 మంది దరఖాస్తు చేశారు.  మొత్తంగా ఉమ్మడి అనంతపురం జిల్లాలో 223 దుకాణాలకు 4783 మంది తమ అదృష్టాన్ని పరీక్షించుకోనున్నారు. ఉమ్మడి అనంతపురం జిల్లా వ్యాప్తంగా 223 మద్యం దుకాణాల ద్వారా ఇప్పటికే దరఖాస్తు ఫీజు రూపంలో ప్రభుత్వానికి రూ.95 కోట్ల 66 లక్షలు సమకూరింది.  

పారదర్శకంగా ఓపెన్‌ లాటరీ 

పారదర్శకంగా మద్యం టెండర్లకు సంబంధించి ఓపెన్‌ లాటరీ నిర్వహించేందుకు అన్ని చర్యలు తీసుకోవాలని అనంతపురం జిల్లా జాయింట్‌ కలెక్టర్‌ శివ్‌ నారాయణ్‌ శర్మ అధికారులను ఆదేశించారు. ఆదివారం జేఎన్టీయూ ఆడిటోరియంలో మద్యం టెండర్ల కోసం అవసరమైన ఏర్పాట్లను ఎక్సైజ్‌ డిప్యూటీ కమిషనర్‌ నాగమద్దయ్య, ఎక్సైజ్‌ సూపరింటెండెంట్‌ రామ్మోహన్‌ రెడ్డితో కలిసి పరిశీలించారు. సోమవారం ఉదయం 7 గంటలకు ఓపెన్‌ లాటరీ ప్రక్రియ మొదలవుతుందని, ఇందుకోసం రెండు కౌంటర్లను ఏర్పాటు చేయడం జరిగిందని శివ్‌ నారాయణ్‌శర్మ తెలిపారు. దరఖాస్తుదారుడికి ఎంట్రీ పాసులు ఇవ్వడం జరుగుతుందని, వారిని మాత్రమే అనుమతిస్తామన్నారు.  

•  ఎక్కడికక్కడ ఇసుక దోపిడీ చేస్తున్న ప్రజాప్రతినిధులు

•  కలెక్టర్, ఎస్పీలకు అక్రమ రవాణా కన్పించడం లేదా?

•  నాలుగు నెలలుగా భవన నిర్మాణ రంగం నిర్వీర్యం

• ఇసుక దోపిడీలో అధికార యంత్రాంగం భాగస్వామ్యం

• జిల్లా అంతటికీ ఒక స్టాక్‌ పాయింట్‌ పెట్టడం ఏంటి?

• మద్యం పాలసీతోనూ టీడీపీ నేతలకే లబ్ధి

• దరఖాస్తుదారులను బెదిరిస్తున్న పరిస్థితి

• ప్రభుత్వ ఆదాయానికి గండికొడుతున్నా పట్టించుకోరా?

• చంద్రబాబు, లోకేష్‌కు ఏమైనా వాటాలు అందుతున్నాయా?

• ఎవర్నీ కంట్రోల్‌ చేయలేని పరిస్థితిలో సీఎం చంద్రబాబు

• ప్రతి గ్రామంలో బెల్టు షాపుల ఏర్పాటుకు రంగం సిద్ధం

• వైసీపీ జిల్లా అధ్యక్షుడు అనంత వెంకటరామిరెడ్డి ఫైర్‌

మనస్సాక్షి, అనంతపురం : రాష్ట్రంలో సంపద సృష్టిస్తానని చెప్పిన చంద్రబాబు.. ఉన్న సంపదను టీడీపీ నేతలకు కట్టబెడుతున్నారని వైసీపీ అనంతపురం జిల్లా అధ్యక్షుడు అనంత వెంకటరామిరెడ్డి మండిపడ్డారు. ఇసుక దోపిడీ జరుగుతున్నా, మద్యం పాలసీలో ప్రభుత్వానికి ఆదాయం గండిపడుతున్నా ఎందుకు పట్టించుకోవడం లేదని ఆగ్రహం వ్యక్తం చేశారు. సీఎం చంద్రబాబు, లోకేష్‌కు ఇందులో వాటాలు ఉన్నాయా? అని ప్రశ్నించారు. మంగళవారం వైసీపీ జిల్లా కార్యాలయంలో ఏర్పాటు చేసిన మీడియా సమావేశంలో ఆయన మాట్లాడుతూ ‘‘ఎన్డీయే కూటమి అధికారంలోకి వచ్చి నాలుగు నెలలు అవుతోంది. ఎన్నికల సమయంలో అనేక హామీలు ఇచ్చారు. సూపర్‌ సిక్స్‌తో పాటు ఉచితంగా ఇసుక అందిస్తామని చెప్పారు. నాణ్యమైన మద్యాన్ని తక్కువ ధరకు అందిస్తామన్నారు. సంపద సృష్టించి పథకాలు అమలు చేస్తామని ఊదరగొట్టారు. కానీ ఈ రోజు ఏం జరుగుతోందో ప్రజలు ఆలోచించాలి. భవన నిర్మాణ రంగంపై రాష్ట్రంలో 60 లక్షల మంది ఆధారపడ్డారు. కూటమి ప్రభుత్వ నిర్వాకం వల్ల నాలుగు నెలల్లో నిర్మాణ రంగం కుదేలైంది. ఈ ప్రభుత్వం ఏర్పడే నాటికి రాష్ట్రంలో 80 లక్షల మెట్రిక్‌ టన్నుల ఇసుక అందుబాటులో ఉండేది. ఎన్నికల ఫలితాలు వచ్చిన తొలి రోజు నుంచే ఇసుకను దోపిడీ చేశారు. రాష్ట్రంలో సంపద సృష్టించడం దేవుడెరుగు.. ఉన్న సంపదను అధికార పార్టీ ప్రజాప్రతినిధులకు దోచిపెట్టడమే పనిగా పెట్టుకున్నారు. వారికి మాత్రమే సంపద సృష్టించారు. జిల్లాలో ఇసుకను ఇతర జిల్లాలు, పక్క రాష్ట్రాలకు తరలిస్తున్నా నియంత్రించలేని పరిస్థితి ఉంది. నిత్యం ప్రజాప్రతినిధుల కన్నుసన్నల్లోనే ఇసుక తరలిపోతోంది. చంద్రబాబు గానీ, రెడ్‌ బుక్‌ రాజ్యాంగం అమలు చేస్తున్న లోకేష్‌కు గానీ ఇసుక దోపిడీ కనిపించడం లేదా? ప్రముఖ పత్రికల్లోనూ పతాక శీర్షికల్లో ఇసుక దోపిడీపై కథనాలు వస్తున్నాయి. అనంతపురం జిల్లాలో నదీపరివాహక ప్రాంతాల్లోని ఇసుకనంతా తోడేస్తున్నారు. పెద్ద ఎత్తున టిప్పర్లతో ఇతర జిల్లాలు, పక్క రాష్ట్రాలకు తరలిస్తున్నారు. ఉచిత ఇసుక అభాసుపాలైందని సీఎం చంద్రబాబు సీరియస్‌ అయినట్లు ప్రచారం జరిగింది. ఆ తర్వాత జిల్లా కలెక్టర్, ఎస్పీలు స్టేట్‌మెంట్‌ ఇచ్చారు. మీకు తెలియకుండానే ఇసుక తరలిపోతోందా? పెన్నా, చిత్రావతి, వేదవతి హగరి, కుషావతి, పాపాగ్ని నదీపరివాహ ప్రాంతాల్లో ఇసుక దోపిడీ జరుగుతోంది. ప్రతి గ్రామం వద్ద జేసీబీలు, ఇటాచీలు పెట్టుకుని నిత్యం వందల సంఖ్యలో తరలిస్తుంటే అధికార యంత్రాంగం ప్రేక్షక పాత్ర వహిస్తోంది. స్టేట్‌మెంట్లకు మాత్రమే నేనూ, మీరే పరిమితం కావాలని కలెక్టర్, ఎస్పీలకు సీఎం చంద్రబాబు చెప్పారా? మీకు చేతకాకుంటే నా వద్దకు వస్తే.. ఎక్కడి నుంచి ఇసుక తరలిపోతోందో చెబుతా..! రాయదుర్గం, కళ్యాణదుర్గం,  తాడిపత్రి, గుంతకల్లు, రాప్తాడు, ధర్మవరం, పుట్టపర్తి, హిందూపురం నియోజకవర్గాల్లో ఎమ్మెల్యేల ఆధ్వర్యంలోనే దోపిడీ జరుగుతోంది. గతంలో రాష్ట్ర ప్రభుత్వ ఖజానాకు ఇసుక ద్వారా ఆదాయం వచ్చేది. కానీ నేడు ఆ పరిస్థితి కూడా లేదు. ఉచిత ఇసుక ఇస్తామని చెప్పారు. గతంలో రూ.15 వేలకు దొరికే ఇసుక ఈ రోజు రూ.22 వేలకు వస్తున్న పరిస్థితి. ఎప్పుడైనా పత్రికల్లో కథనాలు వస్తే ఎద్దుల బండ్లను మాత్రమే పట్టుకుని స్టేషన్లలో పెడుతున్నారు. టిప్పర్లు కనిపించడం లేదా? ఇసుక దోపిడీ వ్యవహారంలో పోలీసులు, రెవన్యూ అధికారులు భాగస్వామ్యం అయ్యారు. స్టేషన్‌కు ఇంత అని వ్యాపారం చేస్తున్నారు. జిల్లాలో ఇంతలా జరుగుతున్న ఇసుక దోపిడీ గురించి సీఎం చంద్రబాబుకు తెలియదా? చివరకు ఎన్నికల్లో గెలిచిన ప్రజాప్రతినిధులు కూడా బెదిరించే పరిస్థితికి వచ్చారు. మేం గెలవకపోతే మీరు ముఖ్యమంత్రి అయ్యేవారా? అని చెప్పే పరిస్థితి వచ్చింది. టీడీపీ ప్రజాప్రతినిధులు ఇసుక దోపిడీ చేస్తూ ఛాలెంజ్‌లు విసురుతున్నా కిమ్మకున్నారు. దీనికి కారణం ఏంటి? మీకు చేతకావడం లేదా? ఎమ్మెల్యేలు మీ కంట్రోల్‌లో లేరా? మీకూ వాళ్లకు ఏమైనా అగ్రిమెంట్‌ ఉందా? ప్రతి టిప్పర్‌ నుంచి పర్సంటేజీ ఏమైనా తండ్రీకొడుకులకు వస్తోందా? అని అడుగుతున్నా. జిల్లా సరిహద్దులోని కడప జిల్లా ఏటూరు నుంచి అనంతపురం జిల్లా కేంద్రానికి నిత్యం టిప్పర్లలో ఇసుక వస్తోంది. సుమారు రూ.24 వేల నుంచి రూ.27 వేల వరకు విక్రయిస్తున్నారు. జిల్లాలో ప్రజాప్రతినిధులను నియంత్రించలేని పరిస్థితి నెలకొంది.  

మద్యం పాలసీలో ఏం జరుగుతోందో తెలుసా?

మద్యం పాలసీలో ఏం జరుగుతోందో అర్థం కాని పరిస్థితి ఉంది. ఎన్డీయే కూటమి అధికారంలోకి రావాలని ఓటు వేసిన మేథావులను సైతం ఆశ్చర్యపరిచేలా ప్రతి ఎమ్మెల్యే బెదిరింపులకు దిగుతున్నారు. దరఖాస్తు చేసుకుంటే వ్యాపారాలు చేసుకోలేరని అంటున్నారు. ఏకంగా సీఐలు, డీఎస్పీలే ఫోన్లు చేస్తున్నారు. మద్యం షాపులకు డీడీలు కట్టి వేసుకుంటే మంచిది కాదని, స్టేషన్లకు రావాలని పిలుపులు వస్తున్నాయి. 2019 కన్నా ముందు కర్ణాటక, తెలంగాణ నుంచి కూడా వచ్చి మద్యం షాపులకు దరఖాస్తు చేసుకున్న పరిస్థితి ఉండేది. కానీ ఇప్పడా పరిస్థితి లేదు. రాష్ట్ర వ్యాప్తంగా లక్ష మంది డీడీలు కడతారనుకుంటే ఇప్పటి వరకు 50 వేల మంది కూడా వేయలేదు. అందరూ కలిసి సిండికేట్‌గా మారారు. క్షేత్రస్థాయిలో పరిస్థితిని ఎస్పీ, కలెక్టర్లు ప్రభుత్వానికి చెప్పడం లేదా? రాష్ట్రాన్ని దోపిడీ చేయాలని అనుకుంటున్నారా? ఇదేనా చంద్రబాబు అనుభవం? ఇదెక్కడి సంస్కృతి. ఎవర్నీ కంట్రోల్‌ చేయలేరా? కూటమి అధికారంలోకి వచ్చినప్పటి నుంచి ఇతరులు వ్యాపారాలు, కాంట్రాక్టర్లు కూడా చేసుకోలేని పరిస్థితి. పరిస్థితి ఇలాగే ఉంటే  వైసీపీనే ప్రజల పక్షాన నిలబడాల్సి వస్తుంది. ఎస్పీ, కలెక్టర్, జాయింట్‌ కలెక్టర్లు మద్యం, ఇసుక విషయంలో నిష్పక్షపాతంగా ఉండండి. కేవలం ప్రకటనలకు పరిమితం కావద్దు. సిండికేట్‌ వల్ల ప్రభుత్వ ఆదాయానికి గండి పడడమే కాకుండా కొంత మంది ప్రజాప్రతినిధుల చేతుల్లోకి అక్రమ సంపాదన చేరుతోంది. ఇసుకకు సంబంధించి జిల్లా అంతా ఒక స్టాక్‌ పాయింట్‌ పెట్టడం ఏంటి? వాస్తవానికి ఇసుక కొరతను ప్రజాప్రతినిధులే సృష్టిస్తూ ఇతర ప్రాంతాలకు ఇసుకను తరలించేస్తున్నారు. గతంలో ఇసుక అక్రమ తవ్వాకాలు జరుగుతున్నాయని కొందరు ఎన్జీటీకి వెళ్లారు. ఇప్పుడు అదే ప్రాంతంలో ఇసుక దోపిడీ జరుగుతోంది.  జిల్లాలో ప్రజాప్రతినిధులు ఎంతగా బరితెగుస్తున్నారంటే.. చివరకు మద్యం షాపుల వద్ద అమ్ముకునే తినుబండారాల విషయంలో కూడా గుత్తాధిపత్యం ఇస్తామంటున్న పరిస్థితి. ఇంతకంటే సిగ్గుచేటు మరొకటి ఉందా? బెల్టు షాపుల ఏర్పాటుకూ రంగం సిద్ధమవుతోంది.

 మనస్సాక్షి, కణేకల్లు : తాగునీటి కార్మికులు ఎదుర్కొంటున్న సమస్యలను పరిష్కరించాలని కోరుతూ ఏపీ రైతు సంఘం ఆధ్వర్యంలో సోమవారం తహసిల్దార్ ఫణి కుమార్ కు వినతిపత్రం అందించారు. గత నెల 5వ తేదీ నుండి 18వ తేదీ వరకు శ్రీరామిరెడ్డి నీటి పథకం కార్మికులు సమ్మె నిర్వహించారు. జిల్లా కలెక్టర్ వినోద్ కుమార్. వీ ఐఏఎస్ వెంటనే స్పందించి సంబంధిత అధికారులతో మాట్లాడి 15 రోజుల్లో కార్మికులకు ఇవ్వాల్సిన 8 నెలల జీతభత్యాలను ఇప్పిస్తానని హామీ ఇవ్వడంతో సమ్మెను విరమింప చేశారు. కానీ ఇప్పటి వరకు జీతభత్యాలు రాకపోవడంతో గత నెల 29 నుండి తాగునీటి కార్మికులు సమ్మె బాట పట్టారు. దీంతో పలు గ్రామాల్లో ప్రజలు తాగునీటి కష్టాలు ఎదుర్కొంటున్నారు. ఇప్పటికైనా జిల్లా కలెక్టర్ స్పందించి ప్రజల కష్టాలను దృష్టిలో ఉంచుకొని శ్రీరామిరెడ్డి నీటి పథకం కార్మికుల సమస్యను పరిష్కరించాలని వినతి పత్రంలో పేర్కొన్నారు. ఈ కార్యక్రమంలో ఏపీ రైతు సంఘం మండల అధ్యక్షులు కే. జై చంద్రారెడ్డి, సీపీఎం మండల కార్యదర్శి కోరి నాగరాజు, కాకిడి శర్మాస్, వైటి.నాగిరెడ్డి తదితరులు పాల్గొన్నారు.

మనస్సాక్షి, నార్పల: అధికార పార్టీ నాయకులు ఇది మంచి ప్రభుత్వమని కార్యక్రమాలు జరుపుకుంటే సరిపోదని, ప్రజలకు రేషన్ సరుకులు సరిగా అందుతున్నాయా లేదా అని పరిశీలించాలని మండల సిపిఐ కార్యదర్శి గంగాధర తెలిపారు. మండల వ్యాప్తంగా రేషన్ సరుకులు సక్రమంగా పంపిణీ జరగకపోవడం వల్ల ప్రజలు అవస్థలు పడుతున్నారని, అధికారులు గానీ ప్రజా ప్రతినిధులుగానే పట్టించుకోవడంలేదని ఆరోపించారు. మండల రెవెన్యూ అధికారుల చర్యలతో ప్రజలు అవస్థలు పడుతున్నారని, ఇప్పటికైనా అధికార పార్టీ నేతలు తగిన చర్యలు తీసుకోవాలని సిపిఐ మండల కార్యదర్శి గంగాధర కోరారు.

మనస్సాక్షి, కణేకల్లు: కణేకల్లు ఈఓఆర్డీ గా చంద్రమౌళి సోమవారం బాధ్యతలు స్వీకరించారు. ఈయన ఉరవకొండ మండలంలో పనిచేస్తూ ఇక్కడికి సాధారణ బదిలీల్లో భాగంగా వచ్చారు. ఇక్కడ పనిచేస్తున్న ఈఓఆర్డీ గూడెన్న కంబదూరు కు బదిలీ అయ్యారు. మండల ప్రజలకు అందుబాటులో ఉంటూ మౌలిక సదుపాయాల కల్పనయే లక్ష్యంగా పనిచేస్తానని నూతన ఈఓఆర్డీ చంద్రమౌళి అన్నారు.

• గెజిట్‌ నోటిఫికేషన్‌ జారీ చేసిన అధికారులు

• నాన్‌ రీఫండబుల్‌ రిజిస్ట్రేషన్‌ ఫీజు రూ. 2 లక్షలు

• ఈనెల 9వ తేదీ వరకు దరఖాస్తుల స్వీకరణ

• 11వ తేదీన అనంతపురం, పుట్టపర్తిలో లక్కీ డ్రా  

• వైసీపీ హయాంలో 192 ప్రభుత్వ మద్యం షాపులు 

• తాజాగా 31 దుకాణాలను పెంచిన ప్రభుత్వం

మనస్సాక్షి ప్రతినిధి, అనంతపురం : మందుబాబులకు కిక్‌ ఎక్కించేందుకు చంద్ర బాబు సర్కార్‌ సిద్ధమైంది. ప్రైవేట్‌ మద్యం టెండర్ల నిర్వహణకు సన్నాహాలు ప్రారంభం అయ్యాయి.  ఉమ్మడి అనంతపురం జిల్లా వ్యాప్తంగా గత వైసీపీ ప్రభుత్వ హయాంలో 192 మద్యం షాపులను ఏర్పాటు చేసి ప్రభుత్వమే నిర్వహించింది. తాజాగా కూటమి ప్రభుత్వం మరో 31 దుకాణాలను పెంచింది. దీంతో ఉమ్మడి అనంతపురం జిల్లాలో 223 మద్యం దుకాణాలు ఏర్పాటు కానున్నాయి. నూతన ఎక్సైజ్‌ పాలసీ ప్రకారం అనంతపురం జిల్లాలో 136, శ్రీ సత్యసాయి జిల్లాలో 87 మద్యం షాపులు రానున్నాయి. ఇందుకు సంబంధించి గెజిట్‌ నోటిఫికేషన్‌ను అనంత పురం, శ్రీసత్యసాయి జిల్లాల ప్రొహిబిషన్‌ అండ్‌ ఎక్సైజ్‌ అధికారులు రామ్మోహన్‌రెడ్డి, గోవింద నాయక్‌లు వేర్వేరుగా మంగళవారం విడుదల చేశారు. అనంతపురం జిల్లాకు సంబంధించి అత్యధికంగా అనంత పురం కార్పొరేషన్‌ పరిధిలో 30 దుకాణాలు ఉన్నాయి. శ్రీసత్యసాయి జిల్లాకు సంబంధించి ధర్మవరం మునిసిపాలిటీ పరిధిలో 10 షాపులు ఉన్నాయి. 

రూ.2 లక్షలు నాన్‌ రీఫండబుల్‌

మద్యం టెండర్లకు సంబంధించిన వివరాలను ఎక్సైజ్‌ శాఖ డిప్యూటీ కమిషనర్‌ నాగమద్దయ్య వెల్లడిరచారు. షాపుల లైసెన్సు కోసం లాటరీ పద్ధతి చేపట్టనున్న నేపథ్యంలో రూ.2 లక్షల నాన్‌ రిఫండబల్‌ రిజస్ట్రేషన్‌ ఫీజుతో దరఖాస్తులు ఆహ్వానించనున్నారు. ఆన్‌లైన్‌, హై బ్రిడ్‌, ఆఫ్‌లైన్‌ పద్ధతుల్లో దరఖాస్తులు స్వీకరించ నున్నారు. ఏ జిల్లాలో మద్యం షాపులకు దరఖాస్తు చేస్తారో ఆ జిల్లా ప్రొహిబిషన్‌ అండ్‌ ఎక్సైజ్‌ అధికారి పేరు మీద రూ.2 లక్షల డీడీ తీయాల్సి ఉంటుంది. ఈనెల 9వ తేదీ వరకు దరఖాస్తుల స్వీకరణ ప్రక్రియ కొనసాగుతుంది. ఈనెల 11వ తేదీన అనంతపురం జిల్లాకు సంబంధించి మద్యం దుకాణాలకు అనంతపురం కలెక్టరేట్‌లోని రెవెన్యూ భవన్‌లో, శ్రీ సత్యసాయి జిల్లాకు సంబంధించి పుట్టపర్తిలోని సాయి ఆరామం ఫంక్షన్‌ హాల్‌లో లాటరీ తీయనున్నారు. లక్కీ డ్రాలో ఎంపికైన వారు రిటైల్‌ ఎక్సైజ్‌ ట్యాక్స్‌లో 1/6 వంతు చెల్లించి మద్యం దుకాణాలను అక్టోబర్‌ 12వ తేదీ నుంచి ప్రారంభించవచ్చు. జనాభా ప్రాతిపదికన వైన్‌షాపులను నాలుగు కేటగిరీలుగా విభజించారు. పదివేలు జనాభా ఉన్న చోట రూ.50 లక్షలు, 10 వేల నుంచి 50 వేలు ఉన్న చోట రూ.55 లక్షలు, 50 వేల నుంచి 5 లక్షలు జనాభా వరకు రూ.65 లక్షలు, 5 లక్షలకుపైన ఉన్నచోట రూ.85 లక్షలు లైసెన్స్‌ ఫీజుగా నిర్ణయించారు. రిటైల్‌ ఎక్సైజ్‌ ట్యాక్స్‌ శ్లాబ్‌కు సంబంధించి  ఉమ్మడి అనంతపురం జిల్లాలో అన్ని దుకాణాలు రూ.55 లక్షలు, రూ.65 లక్షలుగా నిర్ణయించారు. టెండర్‌ దక్కించుకున్న వారు మద్యం దుకాణాలను రెండేళ్ల కాల వ్యవధి వరకు నిర్వహించుకోవచ్చు. 

మండల స్థాయిలో 133 దుకాణాలు 

మద్యం షాపులకు సంబంధించి మునిసిపల్‌ కార్పొరేషన్‌, మునిసిపాలిటీ, నగర పంచా యతీ, మండల స్థాయిగా యూనిట్లు విభజించారు. ఉమ్మడి అనంతపురం జిల్లాలో మండల స్థాయిలోనే అత్యధికంగా 133 ప్రైవేట్‌ మద్యం దుకాణాలు ఏర్పాటు కానున్నాయి. అనంతపురం జిల్లాలో ఏర్పాటు కానున్న  136 షాపుల్లో  కార్పొరేషన్‌ పరిధిలో 30, మునిసిపాలిటీల పరిధిలో 32, మండల స్థాయిలో 74 దుకాణాలు రానున్నాయి. ఇక శ్రీసత్యసాయి జిల్లాకు సంబంధించి మొత్తంగా 87 దుకాణాలు ఏర్పాటు కానుండగా మునిసిపాలిటీల పరిధిలో 22, నగర పంచాయతీ పరిధిలో 6, మండల స్థాయిలో 59 దుకాణాలు రానున్నాయి. 

అప్లికేషన్‌ ఎక్కడ ఇవ్వాలి?

అనంతపురం జిల్లాకు సంబంధించి టెండర్‌ దారులు అనంతపురం, బుక్కరాయసముద్రం, గుత్తి, గుంతకల్లు, తాడిపత్రి, ఉరవకొండ, కణేకల్లు, రాయదుర్గం, కళ్యాణదుర్గం, కంబదూరులో ఉన్న ప్రొహిబిషన్‌ అండ్‌ ఎక్సైజ్‌ స్టేషన్లలో దరఖాస్తులు అందజేయవచ్చు. శ్రీసత్యసాయి జిల్లాకు సంబంధించి పుట్టపర్తి, ధర్మవరం, సీకే పల్లి, పెనుకొండ, హిందూపురం, కదిరి, మడకశిర, తనకల్లులోని  ప్రొహిబిషన్‌ అండ్‌ ఎక్సైజ్‌ స్టేషన్లలో అప్లికేషన్‌లు ఇవ్వాల్సి ఉంటుంది.

 మనస్సాక్షి, కణేకల్లు: కణేకల్లు-మాల్యం గ్రామాల మధ్య వేదవతి నదిలో కొట్టుకుపోయిన రోడ్డుకు మరమ్మతులు చేసినందుకు రాయదుర్గం నుంచి ఉరవకొండకు బస్సు సర్వీసులు ప్రారంభించారు. వేదావతి నదిలో వేసిన మట్టి రోడ్డు కొన్ని నెలల క్రితం వరద ప్రవాహానికి కొట్టుకుపోవడంతో కణేకల్లు మీదుగా ఉరవకొండకు వెళ్లాల్సిన బస్సు సర్వీసులు కణేకల్లు వరకే పరిమితమైయ్యాయి. ఉరవకొండ డిపోకు చెందిన బస్సులు కణేకల్లు మీదుగా రాయదుర్గం వెళ్లాల్సి ఉండగా మాల్యం వరకే పరిమితం కావడంతో ప్రయాణికులు తీవ్ర ఇబ్బందులు ఎదుర్కొన్నారు. సరైన రోడ్డు మార్గం లేక ప్రజలు పడుతున్న కష్టాలను గ్రామస్తులు రాయదుర్గం ఎమ్మెల్యే కాలవ శ్రీనివాసులు దృష్టికి తెచ్చారు. ఎమ్మెల్యే స్పందించి కణేకల్లు మండల టీడీపీ నాయకులకు రోడ్డుకు మరమ్మతులకు ఆదేశించారు. టీడీపీ నాయకులు సొంత నిధులతో చేపట్టిన రోడ్డు మరమ్మతు పనులు పూర్తి కావడంతో ఆదివారం నుంచి బస్సు సర్వీసులు ప్రారంభమయ్యాయి. ఎమ్మెల్యే కాలవ శ్రీనివాసులకు ప్రయాణికులు, గ్రామస్తులు కృతజ్ఞతలు తెలిపారు.

మనస్సాక్షి, బుక్కరాయసముద్రం : గ్రామీణ ప్రాంతాల్లో ఉన్న మహిళా సంఘాల అభివృద్ధికి కేంద్ర రాష్ట్ర ప్రభుత్వాలు ప్రత్యేక చర్యలు చేపడుతున్నాయని మండల ఎంపిపి దాసరి సునీత పేర్కొన్నారు. ఆదివారం మండల కేంద్రంలోని ఐకెపి కార్యాలయంలో ప్రధానమంత్రి నరేంద్ర మోడీ లక్ష్మత్ దీదీ లతో ఇంట్రాక్షన్ లైవ్ కార్యక్రమం నిర్వహించారు. ఈ సందర్భంగా మండల ఎంపీపీ దాసరి సునీత మాట్లాడుతూ మహిళలు సంఘాల ద్వారా కుటుంబాలను ఆర్థికంగా అభివృద్ధి చేసుకోవాలన్నారు. ప్రతి మహిళ సంఘంలో చేరి కుటుంబాలను పోషించుకోవాలన్నారు. సంఘాల అభివృద్ధికి కేంద్ర రాష్ట్ర ప్రభుత్వం ప్రత్యేక చర్యలు చేపడుతోందన్నారు. ఈ కార్యక్రమంలో మండల ఎంపీపీ సునీత ఐకెపి ఏపిఎం మద్దిలేటి.మహిళా సంఘం సభ్యులు తదితరులు పాల్గొన్నారు.

మనస్సాక్షి, అనంతపురం ప్రతినిధి : సార్వత్రిక ఎన్నికల సమయంలో అనంతపురం జిల్లాకు బదిలీ అయిన తహశీల్దార్లు ఎట్టకేలకు మళ్లీ తమ సొంత జిల్లాలకు బదిలీ అయ్యారు. ఈ మేరకు జిల్లా కలెక్టర్‌ డాక్టర్‌ వినోద్‌కుమార్‌ ఉత్తర్వులు జారీ చేశారు. ఇటీవల జరిగిన ఎన్నికల సమయంలో సొంత జిల్లాల్లో ఉన్న వారిని, ఒకే స్థానంలో మూడేళ్ల సర్వీస్‌ పూర్తి చేసుకున్న వారిని ఇతర జిల్లాలకు బదిలీ చేసిన విషయం తెలిసిందే. రాయలసీమలోని అన్నమయ్య, చిత్తూరు, నంద్యాల, తిరుపతి, వైఎస్‌ఆర్‌ కడప, కర్నూలు జిల్లాల నుంచి 35 మంది తహశీల్దార్లు అనంతపురం జిల్లాకు బదిలీపై వచ్చారు. వీరిలో కొందరిని మండలాలకు.. మరికొందరిని కలెక్టరేట్‌, ఆర్డీఓ కార్యాలయాలకు నియమించారు. ప్రస్తుతం ఎన్నికల ప్రక్రియ ముగియంతో తహశీల్దార్లను వారు గతంలో పని చేస్తున్న జిల్లాలకు బదిలీ చేయాలని ఇటీవల రాష్ట్ర ప్రభుత్వం నుంచి ఆదేశాలు వచ్చాయి. ఈ నేపథ్యంలో జిల్లాలో ఉన్న 35 మంది తహశీల్దార్లను వారి సొంత జిల్లాలకు బదిలీ చేస్తూ కలెక్టర్‌ ఉత్తర్వులు జారీ చేశారు. ప్రస్తుతం బదిలీ అయిన తహశీల్దార్లు (మండలాల్లో పని చేస్తున్న వారు) తమ కార్యాలయాల్లో ఉన్న డిప్యూటీ తహశీల్దార్ల (రెగ్యులర్‌)కు బాధ్యతలు అప్పగించాలని ఆదేశాల్లో పేర్కొన్నారు. రెగ్యులర్‌ డిప్యూటీ తహశీల్దార్లు లేని ప్రాంతాల్లో సీనియర్‌ డీటీకి బాధ్యతలు అప్పగించాల్సి ఉంటుంది.  అదేవిధంగా అనంతపురం ఆర్డీఓ కార్యా లయంలో పని చేస్తూ బదిలీ అయిన తహశీల్దార్‌.. అదే కార్యా లయంలో డిప్యూటీ తహశీల్దార్‌గా ఉన్న కె.పద్మావతికి బాధ్యతలు అప్పగించాలని కలెక్టర్‌ తన ఉత్తర్వుల్లో పేర్కొన్నారు. అలాగే కలెక్టరేట్‌లోని ఎస్టాబ్లిష్‌మెంట్‌ సెక్షన్‌లో సూపరింటెండెంట్‌ పని చేస్తున్న తహశీల్దార్‌ను కలెక్టరేట్‌లోని సర్వీసెస్‌`1 డిటీగా ఉన్న ఆంజనేయులుకు బాధ్యతలు అప్పగించాలని పేర్కొన్నారు. ఇక కో ఆర్డినేషన్‌ సెక్షన్‌లో పని చేస్తూ బదిలీ అయిన తహశీల్దార్‌.. కలెక్టరేట్‌ డీ`1 అసిస్టెంట్‌ బాషాకు తన బాధ్యతలు అప్పగించాలని కలెక్టర్‌ వినోద్‌కుమార్‌ ఆదేశాలు జారీ చేశారు. కాగా అనంతపురం జిల్లా నుంచి బదిలీ అయిన తహశీల్దార్లందరూ శనివారమే రిలీవ్‌ కానున్నారు. 

మనస్సాక్షి, కణేకల్లు: కర్ణాటక, ఆంధ్రప్రదేశ్ రాష్ట్రాల ఉమ్మడి ప్రాజెక్టు అనంతపురం, కడప జిల్లాల ప్రజలకు, రైతులకు తాగు, సాగు నీరందించే ప్రధాన జలాశయం తుంగభద్ర డ్యాం నుంచి హెచ్ఎల్సీ సోమవారం అధికారులు నీటిని విడుదల చేశారు. ముందుగా గేట్లకు డ్యాం కార్యదర్శి ఓ ఆర్ కే రెడ్డి, ఎస్ఈ శ్రీకాంత్ రెడ్డి సాంప్రదాయ పద్ధతిలో పూజలు చేశారు. అనంతరం బటన్ నొక్కి హెచ్ఎల్సీకి నీటిని విడుదల చేశారు. జలాశయం నుంచి గంటకు 100 క్యూసెక్కుల నీరు విడుదల అవుతున్నట్లు జలాశయ ఏస్ఈ శ్రీకాంత్ రెడ్డి తెలిపారు. గంట గంటకు 100 క్యూసెక్కులు పెంచుతూ 500 దామాషా ప్రకారం 2వేల క్యూసెక్కుల నీటి విడుదల చేయనున్నట్లు అధికారులు తెలిపారు. హెచ్ఎల్సీకి నీరు విడుదల కావడంతో రైతులు హర్షం వ్యక్తం చేశారు.

మనస్సాక్షి డెస్క్‌ : ఇంజనీరింగ్‌ ప్రవేశాల కోసం నిర్దేశించిన ఎపి ఈఎపిసెట్‌ 2024 తుదిదశ అడ్మిషన్ల ప్రక్రియ జులై 23 ప్రారంభం అవుతుందని సాంకేతిక విద్యా శాఖ  సంచాలకులు, ప్రవేశాల కన్వీనర్‌ డాక్టర్‌ బి నవ్య తెలిపారు. ఆన్‌ లైన్‌ లో రిజిస్ట్రేషన్‌, ప్రాసెసింగ్‌ ఫీజు చెల్లింపు ప్రక్రియను విద్యార్ధులు జులై 23 నుండి జులై 25 లోపు పూర్తి చేయవలసి ఉంటుందన్నారు. జులై 23 నుండి 26 వ తేదీ వరకు సర్టిఫికేట్ల వెరిఫికేషన్‌ ఉంటుందని, జూలై 24 నుండి 26 వరకు 3 రోజుల పాటు ఆప్షన్ల ఎంపిక పూర్తి చేసుకోవాలని కన్వీనర్‌ స్పష్టం చేసారు. ఐచ్చికాల మార్పుకు 27వ  తేదీ నిర్దేశించామన్నారు. 30వతేదీన సీట్ల కేటాయింపును పూర్తి చేస్తామని తెలిపారు. సెల్స్‌ జాయినింగ్‌, కళాశాలలో రిపోర్టింగ్‌ కోసం  జూలై 31 నుండి ఆగస్టు 3 వరకు నాలుగు పాటు అవకాశం ఉంటుందన్నారు. ఇప్పటికే జులై 19వ తేదీ నుండి తరగతులు ప్రారంభం అయ్యాయని డాక్టర్‌ నవ్య వివరించారు.

మనస్సాక్షి, కణేకల్లు: కణేకల్లులోని షిరిడీ సాయిబాబా ఆలయంలో ఆదివారం గురుపౌర్ణమి వేడుకలు ఘనంగా నిర్వహించారు. వేకువజామున ఆలయ అర్చకులు గణపతి హోమం, శివ సాయి విగ్రహభిషేకం, మహా మంగళహారతులు తదితర ప్రత్యేక పూజలు నిర్వహించి అలంకరణ చేశారు. అనంతరం భక్తులకు దర్శనం కల్పించారు. షిరిడి సాయిబాబాను దర్శించుకునేందుకు భక్తులు పోటెత్తారు. రాయదుర్గం ఎమ్మెల్యే కాలవ శ్రీనివాసులు పార్టీ శ్రేణులతో కలిసి స్వామివారిని దర్శించుకున్నారు. ప్రజలందరూ సుభిక్షంగా ఉండాలని షిరిడిసాయిని వేడుకున్నట్లు ఎమ్మెల్యే తెలిపారు. సాయినాథుని దర్శనానికి వచ్చిన ఎమ్మేల్యే కాలవ శ్రీనివాసులు కు ఆలయ నిర్వాహకులు ఘనస్వాగతం పలికి శాలువాతో సత్కరించారు.  దర్శనానికి వచ్చిన భక్తులకు ఆలయ కమిటీ  ఆధ్వర్యంలో తీర్థ ప్రసాదాలు, అన్నదానం కార్యక్రమాన్ని ఏర్పాటు చేశారు. ఎమ్మేల్యే చేతుల మీదుగా భక్తులకు భోజనాలు వడ్డింపు కార్యక్రమాన్ని ప్రారంభించారు. గురు పౌర్ణమి సందర్భంగా చెక్కభజన చేసిన వారికి ఆలయ కమిటీ సభ్యులు సన్మానించారు.

మనస్సాక్షి, కణేకల్లు : రాయదుర్గం ఎమ్మెల్యే కాలవ శ్రీనివాసులు కృషి ఎట్టకేలకు ఫలించింది. కణేకల్లులోని చిక్కణ్ణేశ్వర చెరువు అవుట్‌ ఫాల్‌ రెగ్యులేటర్‌ మరమ్మతు పనులు, కణేకల్లు - గంగులాపురం వంతెన నిర్మాణం అనతికాలంలో పూర్తి చేయాలని ఆదేశించారు. దీంతో  స్థానిక టీడీపీ నాయకులు సొంత నిధులతో చెరువు అవుట్‌ ఫాల్‌ రెగ్యులేటర్‌ మరమ్మతు పనులు, వంతెన నిర్మాణ పనులు ఆదివారం కాంక్రీట్‌ స్లాబ్‌ తో చివరిదశ పనులు ముగించారు. వారం తరువాత వంతెన వారధిపై ఆటోలు, ఎడ్ల బండ్లు, ద్విచక్రవాహనాలకు మాత్రమే రాకపోకలు ప్రారంభం కానున్నాయి. ఈ కార్యక్రమంలో నాయకులు లాలెప్ప, ఆనంద్‌, రైస్‌ మిల్‌ చంద్ర, మాబు సాబ్‌, బీటీ రమేష్‌, చాంద్‌ బాషా, జిలాన్‌, కురుబ నాగరాజు తదితరులు పాల్గొన్నారు.

మనస్సాక్షి, అనంతపురం ప్రతినిధి : విద్యుత్‌ శాఖ ఉమ్మడి అనంతపురం జిల్లా సూపరింటెండెంట్‌ ఇంజనీర్‌ (ఎస్‌ఈ)గా ఎట్టకేలకు కె.సంపత్‌కుమార్‌ ఆదివారం బాధ్యతలు చేపట్టారు. ఎగ్జిక్యూటివ్‌ ఇంజనీర్‌ (ఈఈ)గా తిరుపతి కార్పొరేట్‌ ఆఫీస్‌లో పని చేస్తున్న సంతప్‌కుమార్‌కు ఎస్‌ఈగా పదోన్నతి కల్పిస్తూ ఉమ్మడి అనంతపురం జిల్లా ఎస్పీడీసీఎల్‌ ఎస్‌ఈగా నియమించారు. ఈ మేరకు రెండ్రోజుల క్రితం ఉత్తర్వులు వెలువడిన విషయం తెలిసిందే. శనివారం ఉదయమే ఆయన బాధ్యతలు స్వీకరిస్తారని తెలిసి జిల్లా వ్యాప్తంగా పెద్ద ఎత్తున ఉద్యోగులు విద్యుత్‌శాఖ కార్యాలయానికి చేరుకున్నారు. అయితే సాంకేతిక సమస్య కారణంగా బాధ్యతల స్వీకరణ విషయంలో కాస్త గందరగోళం ఏర్పడిరది. చివరకు ఆదివారం మధ్యాహ్నం ఆయన ఎస్‌ఈగా బాధ్యతలు స్వీకరించారు. ఉమ్మడి అనంతపురం జిల్లాలో చాలా కాలం పాటు పని చేసిన సంపత్‌కుమార్‌కు మంచిపేరు ఉంది. అందరితో స్నేహపూర్వకంగా ఉండడం.. పని చేసిన ప్రతి చోటా కింది స్థాయి సిబ్బందితోనూ ఎలాంటి వివాదాలు లేకుండా ఉండడం ఆయన పనితీరుకు నిదర్శనం. సంపత్‌కుమార్‌ బాధ్యతలు స్వీకరించాక పెద్ద ఎత్తున ఉద్యోగులు, ఉద్యోగ సంఘాల నాయకులు ఆయన్ను కలిసి శుభాకాంక్షలు తెలియజేశారు. డిప్యూటీ ఈఈలు శ్రీనివాసులు, వివేకానంద స్వామి, రామకృష్ణ, ఏఏఓ గంగన్న, ఫోర్‌మన్‌ గోపాల్‌ తదితరులు ఎస్‌ఈ సంపత్‌కు పుష్పగుచ్ఛాలు అందజేశారు. ఇదిలా ఉండగా గతంలో సంపత్‌కుమార్‌ కదిరి ఏఈ, ఏడీఈగా సుమారు 17 ఏళ్లు పని చేశారు. ఆ తర్వాత గుంతకల్లు, హిందూపురం ఏడీఈగా పని చేశారు. ఆ తర్వాత అనంతపురం ఆపరేషన్స్‌, ట్రాన్స్‌ఫార్మర్స్‌ డీఈగా పని చేసిన అనుభవం ఉంది. ప్రజలు, రైతాంగానికి మెరుగైన సేవలను అందించమే తన లక్ష్యమని ఎస్‌ఈ సంపత్‌ తెలియజేశారు. 

మనస్సాక్షి, అనంతపురం ప్రతినిధి :  రాష్ట్రంలో భారీగా ఐఏఎస్‌ల బదిలీలు జరిగాయి. 62 మంది ఐఏఎస్‌లకు పోస్టింగ్‌, బదిలీ చేశారు. అనంతపురం జిల్లా జాయింట్‌ కలెక్టర్‌ కేతన్‌ గార్గ్‌ బదిలీ అయ్యారు. ఈ మేరకు చీఫ్‌ సెక్రటరీ నీరబ్‌కుమార్‌ ప్రసాద్‌ ఉత్తర్వులు జారీ చేశారు. కేతన్‌గార్గ్‌ను రాజమహేంద్రవరం మునిసిపల్‌ కమిషనర్‌గా నియమించారు. అదేవిధంగా అనంతపురం నగర పాలక సంస్థ కమిషనర్‌గా ఉన్న మేఘ స్వరూప్‌ను మదనపల్లె సబ్‌ కలెక్టర్‌గా నియమించారు. అనంతపురం జిల్లా పరిషత్‌ సీఈఓగా ఉన్న వైఖోమ్‌ నిదియా దేవిని రాజంపేట సబ్‌ కలెక్టర్‌గా పోస్టింగ్‌ ఇచ్చారు. 

మనస్సాక్షి, అనంతపురం : సదరన్‌ పవర్‌ డిస్ట్రిబ్యూషన్‌ కంపెనీ లిమిటెడ్‌ (ఎస్పీడీసీఎల్‌) ఉమ్మడి అనంతపురం జిల్లా సూపరింటెండెంట్‌ ఇంజనీర్‌ (ఎస్‌ఈ)గా కె.సంపత్‌కుమార్‌ నియమితులయ్యారు. ఈ మేరకు ఎస్పీడీసీఎల్‌ చైర్మన్‌ అండ్‌ ఎండీ సంతోషరావు ఉత్తర్వులు జారీ చేశారు. గతంలో సంపత్‌కుమార్‌ కదిరి ఏఈ, ఏడీఈగా సుమారు 17 ఏళ్లు పని చేశారు. ఆ తర్వాత గుంతకల్లు ఏడీఈగా ఏడాది పాటు ఉన్నారు. అనంతరం హిందూపురం ఏడీఈగా నాలుగేళ్లు, ఆ తర్వాత అనంతపురం ఆపరేషన్స్‌, ట్రాన్స్‌ఫార్మర్స్‌ డీఈగా పని చేశారు. రాష్ట్ర విభజన సమయంలో విద్యుత్‌ శాఖలో సిబ్బందిని తెలంగాణకు కేటాయించారు. అయితే ఉద్యోగులు సుప్రీంకోర్టును ఆశ్రయించగా కోర్టు ఉత్తర్వుల మేరకు మళ్లీ ఏపీకి కేటాయించారు. ఈ నేపథ్యంలో సంపత్‌కుమార్‌ ఎగ్జిక్యూటివ్‌ ఇంజనీర్‌ (ఈఈ)గా తిరుపతి కార్పొరేట్‌ ఆఫీస్‌గా బాధ్యతలు తీసుకున్నారు. తాజాగా ఈఈ నుంచి సూపరింటెండెంట్‌ ఇంజనీర్‌ (ఎస్‌ఈ)గా పదోన్నతి కల్పిస్తూ ఉమ్మడి అనంతపురం జిల్లాకు నియమించారు. కాగా శనివారం అనంతపురంలోని విద్యుత్‌శాఖ కార్యాలయంలో ఆయన బాధ్యతలు స్వీకరించనున్నారు. 

మనస్సాక్షి, అనంతపురం ప్రతినిధి : వైఎస్‌ఆర్‌ కాంగ్రెస్‌ పార్టీ నుంచి కదిరి మాజీ ఎమ్మెల్యే డాక్టర్‌ సిద్దారెడ్డి సస్పెండ్‌ అయ్యారు. ఈ మేరకు వైసీపీ అధినేత వైఎస్‌ జగన్‌మోహన్‌రెడ్డి ఆదేశాల మేరకు కేంద్ర కార్యాలయం నుంచి ప్రకటన విడుదల చేశారు. ఇటీవల జరిగిన సార్వత్రిక ఎన్నికల్లో డాక్టర్‌ సిద్దారెడ్డి పార్టీ వ్యతిరేక కార్యకలాపాలకు పాల్పడినట్లు ఫిర్యాదులు రావడంతో క్రమశిక్షణ కమిటీ సిఫార్సు మేరకు ఈ నిర్ణయం తీసుకున్నట్లు పేర్కొన్నారు. కాగా గత ఎన్నికల్లో ఉమ్మడి అనంతపురం జిల్లాలోని పలు నియోజకవర్గాల్లో పలువురు ప్రజాప్రతినిధులు, కీలక నాయకులు వైసీపీకి వ్యతిరేకంగా పని చేసినట్లు అధిష్టానం గుర్తించింది. తెలుగుదేశం పార్టీతో లోపాయికారి ఒప్పందాలు కుదుర్చుకుని వైసీపీ అభ్యర్థుల ఓటమే లక్ష్యంగా పనిచేసినట్లు ఫిర్యాదులు కూడా వెళ్లాయి. ఈ క్రమంలోనే తాజాగా డాక్టర్‌ సిద్దారెడ్డిపై వేటు పడగా.. త్వరలోనే మరికొంత మందిని పార్టీ నుంచి సస్పెండ్‌ చేసే అవకాశాలు ఉన్నట్లు సమాచారం. ఎన్నికల్లో ఘోర ఓటమి తర్వాత వైసీపీలో పూర్తి ప్రక్షాళన ప్రారంభమైనట్లు తెలుస్తోంది. ప్రధానంగా పార్టీలోనే ఉంటూ వెన్నుపోటు పొడుస్తున్న వారిని ఉపేక్షించాల్సిన అవసరం లేదని అధిష్టానం భావిస్తున్నట్లు సమాచారం. 
 

మనస్సాక్షి, అనంతపురం ప్రతినిధి : రాష్ట్రంలో ఐఏఎస్‌లను బదిలీ చేస్తూ ప్రభుత్వం ఉత్తర్వులు జారీ చేసింది. శ్రీ సత్యసాయి జిల్లా కలెక్టర్‌గా ఉన్న అరుణ్‌బాబు పల్నాడు జిల్లా కలెక్టర్‌గా బదిలీ అయ్యారు. ప్రస్తుతం ఏపీ బేవరేజ్‌ కార్పొరేషన్‌ ఎండీగా ఉన్న చేతన్‌ను శ్రీ సత్యసాయి జిల్లా కలెక్టర్‌గా నియమించింది. 

ఐఏఎస్‌ల బదిలీల వివరాలు  

https://www.manassakshi.net/media/2024-07/g-o-rt-no-1160-dt-02-07-2024.pdf

మనస్సాక్షి, అనంతపురం ప్రతినిధి :  సార్వత్రిక ఎన్నికల కౌంటింగ్‌ ప్రక్రియను సమర్థవంతంగా నిర్వహించేందుకు అనంతపురం జిల్లాకు ఎన్నికల కమీషన్‌ కౌంటింగ్‌ పరిశీలకులను నియమించింది. ఎన్నికల కౌంటింగ్‌ సంబంధించి ఏదైనా ఫిర్యాదు కోసం కౌంటింగ్‌ పరిశీలకుల ఫోన్‌ నెంబర్లను, వివరాలను జిల్లా యంత్రాంగం ప్రకటించింది. రాయదుర్గం, తాడిపత్రి, గుంతకల్లు అసెంబ్లీ నియోజకవర్గాలకు సంబంధించి కౌంటింగ్‌ పరిశీలకులు అజయ్‌ కుమార్‌ అనంతపురంలోని ఆర్‌.అండ్‌.బి అతిథి గృహంలో ఉన్న సూట్‌ నెంబర్‌ - 4 లో అందుబాటులో ఉండనున్నారు. ఉదయం 10 గంటల నుంచి 11 గంటల వరకు ప్రజలు, అభ్యర్థులు, రాజకీయ పార్టీలకు చెందిన వారు కౌంటింగ్‌ పరిశీలకుడు అజయ్‌ కుమార్‌ (మొబైల్‌ నంబర్‌ :  9871522030)కు ఫిర్యాదు చేయవచ్చు.

• 94 నుంచి 104 స్థానాల్లో వైసీపీ విజయం

• 71 నుంచి 81 స్థానాల్లో కూటమి గెలుపు

• కడపలో డిపాజిట్‌ కోల్పోనున్న వైఎస్‌ షర్మిల

మనస్సాక్షి డెస్క్‌ : ఎప్పుడెప్పుడా అని ఎదురుచూస్తున్న ఎగ్జిట్‌ పోల్స్‌ విడుదలయ్యాయి. తెలుగు రాష్ట్రాల్లో పేరు పొందిన ఆరా మస్తాన్‌ ఏర్పాటు చేసిన ‘ఆరా పోల్‌ స్ట్రాటజీస్‌’ తన ఫలితాలు విడుదల చేసింది. ఎన్నికల సమయంలో ఎవరు గెలుస్తారు? ఎవరు ఓడిపోతారనే విషయాన్ని పూసగుచ్చినట్టు వివరించడంలో ఈ సంస్థకు మంచి  పేరుంది. క్షేత్రస్థాయిలో బలమైన నెట్‌ వర్క్‌ ఉన్న ఆరా మస్తాన్‌.. గ్రౌండ్‌ లెవిల్లో.. ప్రతి విషయాన్నీ అంచనా వేయడంలో ముందుంటారు. ఏ పార్టీ గెలుస్తుందనే విషయంతో పాటు నాయకుల గెలుపును కూడా అంచనా వేయడంలో ‘ఆరా’కు ప్రత్యేక గుర్తింపు ఉంది. తాజాగా విడుదల చేసిన ఎగ్జిట్‌ పోల్‌ ఫలితాల్లో మరోసారి వైసీపీ అధికారంలోకి వస్తుందని ఆరా మస్తాన్‌ వెల్లడిరచారు. 49.61 శాతం ఓట్లతో 94 నుంచి 104 అసెంబ్లీ స్థానాలను వైసీపీ కైవసం చేసుకోనున్నట్లు వివరించారు. ఇక తెలుగుదేశం, జనసేన, బీజేపీ కూటమి 47.55 శాతం ఓట్లతో 71 నుంచి 81 స్థానాలకు పరిమితం కానున్నట్లు స్పష్టం చేశారు. ఇతర పార్టీలు, స్వతంత్ర అభ్యర్థులు 3.04 శాతం ఓట్లు సాధించనున్నట్లు ప్రకటించారు. 

ఇక పార్లమెంట్‌ స్థానాలకు సంబంధించి 25 ఎంపీలకు గాను 13 నుంచి 17 స్థానాల్లో వైసీపీ విజయం సాధిస్తుందని ప్రకటించారు. ఎంపీ స్థానాల్లో 48.29 శాతం ఓట్లు వైసీపీ సాధించనుంది. ఇక ఎన్డీఏ కూటమి 47.68 శాతం ఓట్లతో 10 నుంచి 12 ఎంపీ స్థానాల్లో విజయం సాధిస్తుందని ఆరా మస్తాన్‌ వెల్లడిరచారు. అదేవిధంగా 4.03 శాతం ఓట్లు కాంగ్రెస్‌, ఇతర పార్టీలు, స్వతంత్రులకు పడినట్లు స్పష్టం చేశారు. ఏపీలోని పార్లమెంట్‌ స్థానాల్లో కాంగ్రెస్‌ పార్టీ 3 శాతం ఓట్లు చీల్చడం వల్ల వైసీపీ మూడు ఎంపీ స్థానాలు కోల్పోనున్నట్లు ప్రకటించారు. అసెంబ్లీ ఎన్నికలకు సంబంధించి వైసీపీకి ఓటు వేసిన ఓటర్లు.. ఎంపీ విషయంలో మాత్రం కాంగ్రెస్‌కు ఓటు వేయడం వల్ల వైసీపీకి పార్లమెంట్‌ స్థానాల్లో నష్టం జరగనున్నట్లు వెల్లడిరచారు. ఇక కడప నుంచి ఎంపీగా పోటీ చేస్తున్న వైఎస్‌ షర్మిలకు డిపాజిట్‌ కూడా దక్కదని ఆరా మస్తాన్‌ వెల్లడిరచారు. ఇదిలావుండగా 2019 ఏపీ అసెంబ్లీ ఎన్నికల్లో ఆరా మస్తాన్‌ సర్వే చేసి ఎగ్జిట్‌ పోల్‌ విడుదల చేశారు. ఇందులో వైసీపీకి 119 నుంచి 126 అసెంబ్లీ స్థానాలు.. టీడీపీకి 47 నుంచి 56 స్థానాలు వస్తాయని అంచనా  వేయగా.. ఆ ఎన్నికల్లో వైసీపీ ఏకంగా 151 అసెంబ్లీ స్థానాల్లో విజయం సాధించింది. తెలుగుదేశం పార్టీ 23 స్థానాలకు పరిమితం అయ్యింది. 

మనస్సాక్షి, ఎలక్షన్‌ డెస్క్‌ : సార్వత్రిక ఎన్నికలకు వైఎస్‌ఆర్‌ కాంగ్రెస్‌ పార్టీ పూర్తి స్థాయిలో సమాయత్తం అవుతోంది. ఇందులో భాగంగా ఈనెల 16వ తేదీన వైసీపీ తుది జాబితా విడుదల చేయనున్నారు.  రాష్ట్ర వ్యాప్తంగా 175 అసెంబ్లీ, 25 లోక్‌ సభ స్థానాలకు అభ్యర్థులను వైఎస్‌ఆర్‌ జిల్లా ఇడుపులపాయలో ముఖ్యమంత్రి వైఎస్‌ జగన్‌మోహన్‌రెడ్డి ప్రకటించనున్నారు. మార్చి 18వ తేదీ నుంచి ఎన్నికల ప్రచారం షురూ కానుంది. శ్రీకాకుళం జిల్లా ఇచ్ఛాపురం నుంచి ఎన్నికల ప్రచారంను సీఎం జగన్‌ ప్రారంభిస్తారు. అదే రోజు విజయవాడ వెస్ట్, నెల్లూరు రూరల్‌లో ఎన్నికల ప్రచారం చేయనున్నారు. 
 

మనస్సాక్షి, ఎలక్షన్‌ డెస్క్‌ : రాష్ట్రంలో రాజకీయం రసవత్తరంగా మారింది. బీజేపీ, టీడీపీ, జనసేన మధ్య పొత్తు ఖరారైంది. ఈ మేరకు ఉమ్మడి ప్రకటన విడుదల అయ్యింది. బీజేపీ జాతీయ అధ్యక్షుడు జేపీ నడ్డా నుంచి శనివారం సాయంత్రం అధికారిక ప్రకటన విడుదల చేశారు. మోదీ నాయకత్వంలో బీజేపీ, టీడీపీ, జనసేన కట్టుబడి ఉన్నాయని నడ్డా పేర్కొన్నారు. ఎన్డీఏలోకి చంద్రబాబు రాకను ఆహ్వానిస్తున్నట్లు నడ్డా ట్వీట్‌ చేశారు. 2014 ఎన్నికల్లో కలిసి పని చేసిన విషయాన్ని ఉమ్మడి ప్రకటనలో పేర్కొన్నారు. ఏపీ అసెంబ్లీ, లోక్‌ సభ ఎన్నికల్లో కలిసి పోటీ చేస్తామని స్పష్టం చేశారు. మొత్తానికి రాష్ట్రంలో పొత్తు పొడవడంతో ఇక రాజకీయం వేడెక్కనుంది.  

మనస్సాక్షి, అనంతపురం : అనంతపురంలో తాగునీటి సమస్య పరిష్కారం కోసం అధికార యంత్రాంగం రంగంలోకి దిగింది. ప్రత్యేకంగా అనంతపురం జాయింట్‌ కలెక్టర్‌ కేతన్‌ గార్గ్‌ నేరుగా ప్రజల వద్దకు వెళ్లి నీటి సమస్యకు గల కారణాలను వివరించారు. మార్చి 10వ తేదీ నాటికి యధావిధిగా నీటి సరఫరా చేసేలా చర్యలు తీసుకుంటామని స్పష్టం చేశారు. ఇదే సమయంలో ప్రస్తుతం 14 ట్యాంకర్ల ద్వారా నీటి సరఫరా జరుగుతోందని, అదనంగా 15 ట్యాంకర్లను ప్రతి రోజు ఇంటింటికీ పంపాలని అధికారులను ఆదేశించారు. నగరంలోని నీటి సరఫరా సమస్యపై మునిసిపల్‌ పట్టణ అభివృద్ధి శాఖ స్పెషల్‌ చీఫ్‌ సెక్రటరీ ఆదేశాలతో బుధవారం కర్నూలు కార్పొరేషన్‌ కమిషనర్‌ భార్గవ్‌ తేజ, అనంతపురం కమిషనర్‌ మేఘ స్వరూప్‌లు పెన్న అహోబిలం బ్యాలెన్సింగ్‌ రిజర్వాయర్‌ వద్ద ఉన్న పంప్‌ హౌస్‌ ను   సందర్శించారు. మోటార్ల పనితీరును పరిశీలించారు. ప్రస్తుతం రెండు 500 హెచ్‌.పి మోటర్లు రోజుకు 20 గంటలు పనిచేస్తున్నాయని, ఫలితంగా నగరంలోని చివరి ప్రాంతాలైన ఫెర్రర్‌ కాలనీ, శారద నగర్‌, ఎస్‌.బి ఐ. కాలనీ, బుడ్డప్ప  నగర్‌, శ్రీనగర్‌ కాలనీ, మంగళవారి కాలనీ ప్రాంతాలకు నీటి సమస్య ఏర్పడిరదని చెప్పారు. కాగా  నీటి సమస్య ఉన్న  బుడ్డప్ప నగర్‌, ఫెర్రర్‌ కాలనీలను కమిషనర్లు మేఘ స్వరూప్‌, భార్గవ్‌ తేజ, నగర పాలక అధికారులతో కలిసి జాయింట్‌ కలెక్టర్‌ కేతన్‌ గార్గ్‌ సందర్శించారు. స్థానికులతో మాట్లాడారు. ఇంతకు ముందు ప్రతి రోజు గంట పాటు నీరు వదిలేవారని, కొన్ని రోజుల నుంచి అరగంట మాత్రమే నీటి సరఫరా చేస్తున్నట్లు స్థానికులు జేసీ కేతన్‌ గార్గ్‌ దృష్టికి తెచ్చారు. దీంతో ఆయన నీటి సమస్య ఎందుకు వచ్చిందో ప్రజలకు వివరించారు. స్టాండ్‌  బైగా మూడవ మోటర్‌ను మార్చి 10వ తేదీ లోపు మరమ్మతు చేయించి నగరంలో యథావిధిగా నీటి సరఫరా చేసేలా చర్యలు తీసుకుంటామని తెలియజేశారు. కార్యక్రమంలో ఇన్‌చార్జ్‌ ఎస్‌ఈ రామ్మోహన్‌, ఈఈ సూర్యనారాయణ తదితరులు పాల్గొన్నారు. 

నీటి ట్యాంకర్ల కోసం ఫోన్‌ చేయండి

మోటార్ల మరమ్మతు కారణంగా అనంతపురం నగరంలో తాగునీటి సమస్య ఏర్పడిరదని ఎస్‌ఈ రామ్మోహన్‌ తెలిపారు. బుధవారం నీటి సరఫరా లేని, సమస్యాత్మక ప్రాంతాలకు 14 ట్యాంకర్లతో 63 ట్రిప్పుల ద్వారా నీటి సరఫరా అందించామన్నారు. మూడవ మోటార్‌ను త్వరగా మరమ్మతు చేసి నీటి సరఫరా చేస్తామని, ప్రజలు సహకరించాలని తెలిపారు. వాటర్‌ ట్యాంక్‌ కోసం చంద్రశేఖర్‌ (డీఈఈ) - 9849907387, సుబ్బిరెడ్డి (వర్క్‌ఇన్‌స్పెక్టర్‌) -  9703021788, శ్రీనివాసులు (వర్క్‌ఇన్‌స్పెక్టర్‌) 7702738209 నంబర్లకు ప్రజలు కాల్‌ చేయాలని కోరారు.